田北辰搭錯車

田北辰搭錯車
--劉錦

呢排INMEDIA討論教學語言既文章真多，個個都差隻腳去講去寫搞到呢度好熱鬧﹗聽聞中大要用「國際化」言語教學，第日全部堂要用晒英文上堂，搞到大把師生反對，d校友仲衝晒出黎大講自己學習經歷，想話比上面班大佬知道：咪搞埋晒D咩「國際化」。其實我對語文教學不嬲都有D意見，今次都湊熱鬧講d野，不過唔係講中大國際化，係講下呢幾日「得罪晒所有人」o既母語教學方案。

我估好多人都知道語常會搞左個小組，佢地最近就推左個「母語教學政策檢討方案」。阿田主席話呢舊野都傾左都幾年，要針對既係一個三十年都搞唔掂既母語教學問題。佢有心搞架，不過翻來覆去，最後又搞左個大頭佛出黎，仲比人話「得罪晒所有人」。佢今日係港台節目星期六問責度苦口婆心，講到明呢個報告書係要大家唔好再用「中中」同「英中」標籤「好」同「壞」，「英中」唔係最勁抽架，母語先係學習既最佳語言﹗但點知個報告出左，就比勁多人插佢話唔重視英語教育既貢獻，又話個報告書自相矛盾，無可能消除標籤，咪搞埋晒d咁既野。

田主席之所以比人插，係因為報告講明會繼續將「中中」同「英中」分家，但佢又要叫d家長學生咪再用中中、英中標籤學校既「好」與「壞」。聽落 好似真係唔係幾make sense，如果個小組想香港人唔好再咁諗，點解唔直接全部學校都轉晒中中咪一天都光晒囉，大家無野可以再標籤啦﹗阿田少收尾補飛話：咁總有d人鐘意用英 文做教學語言既，我地都要尊重佢意願，但考慮到有d中一學生、中學老師同埋學校配套事實上真係缺乏「先天能力」，佢地如果無能力用英文教學，夾硬迫佢地教 英中、或者迫d學生入唔夠能力用英文教既中學，要佢受埋d唔知咩既英文教育，咪棧害左佢。一d比較有能力既學校同埋學生，證明左到自己有能力既，咪比佢繼 續用英文囉。

測量d學校有無能力用英文教。其中一個criteria係d老師要會考最少有C或者IELTS 有6級或以上。其實，有考過會考既人都知啦，英文拎到C或以上個RANGE都唔過20%，咁咪又即係標籤D學校先？最好果埋老師都係係晒英中架啦﹗家長要搵學校又咪跟番呢D item，最後咪又係標籤？個主持好唔客氣咁話：田主席，你個報告唔只係講緊「上落車」定「轉車」啦，咁搞法新機制直頭係幫d英中搞埋QC啦﹗

個節目愈聽愈唔對路，田主席好似又想推母語叫人唔好標籤，但又要面對住一個事實：個報告書似乎真係標籤緊「有能力」同「唔夠能力」，而且好多家長事實上不嬲係用英中做標準搵學校架喎？報告之所以比人鬧到狗彩，係因為如果真係行左呢個「母語教學政策檢討方案」，最後會有一堆慢慢緊既英中有機會要「落車」，於是咪搵到天怒人怨，家長又鬧、英中校長又鬧、學生又唔知佢搞乜囉。

點先可以話比d家長學生知，用母語學習比起英語更加快靚正先？雖然有專家話無論你點叻，母語係最好既學習語言，用母語學習能力會高D，而且對學第二語言點都有好處。但似乎我地又無數據比社會睇下用母語學英文真係比英中好？雖然有就最正，prove比英中d學生家長睇，等佢地都報讀中中。但老實講真係無乜喎。而且，係英中讀書接觸英文既時間真係比中中好架喎，英文實好過人架啦，咁好似justify唔到係中中學英文比英中好架喎？

唉……其實我覺得田主席都好慘，佢自己都覺得一間學校好定唔好，唔係睇output， 而係睇「增值」，咁先對教育公平。如果個個老師可以用英文，學生表面上係高能，但佢話咁又唔一定代表間學校係好。在佢理念黎講，無話好定唔好。只不過整體 老師、學生、配套既先天條件。所以就算d英中校長interview學生，都係要睇下d candidates有冇motivation、對學習有無興趣、課外活動有無commitment，佢仲話商界請人都係咁架啦﹗

其實個節目真係好有趣。第一：今次真係一個商界領袖落手落腳去搞教育，平時我地見到所謂「商界」最叻指指點點，又話d 學生英文差又盛，但到商人自己搞教育，佢地遇到既問題都係一樣，一方面係教育理念，一方面又係教育體制入面不同角色持有既價值取向。第二係平時我地聽到所 謂「商界」既「語言價值」，例如要standard英文，係落實搞起教育上黎落到家長、老師、學生層面就完全唔work，有個學生仲打去同田主席話：其實 依家上堂用英文書、廣東話教最好，中五之前係英中度讀用晒英文成班同學完全唔知佢up 乜，校長、老師、家長都係賺個名o者，無人黎睇課又咪用晒中文傾野﹗搞到田主席都無野講，問來問去都係：「係咪我地個機制唔夠客觀？定係評定學生既尺度唔 夠嚴密？」完全牛頭唔搭馬咀。

係香港，一向有人自稱以「商界價值」評教育，將「香港語文水評下降」講到係一個社會恐懼，其實提呢D 野出來既人係持一種咩野既「商界價值」呢？呢個問題事實上有無影響過香港既營商環境呢？講呢d「價值」出來既人似乎好似係「商界靈魂」上身，去代表「商 界」講野。佢地up果d point例如話d後生仔d grammar錯晒、講既英文唔正之類，general到係任何地方任何時空講都可以係正確。但我信「國際城市」唔係需要一d「矯枉過正」既語文政策，乜「國際」係咁架咩？我淨係知有「國際權威商業評級」話香港既空氣污染水評會影響到營商環境，而早排又有23個外國商會聯名致函董建華，叫港府處理環境好空氣汙染問題，如果唔係會有可能撤資。真正商業權威講既野就唔理，反而要討論「上車」、「落車」、「轉車」，比我既感覺係其實大家都「搭錯車」Miss the point﹗

圖片來源：HK yahoo news

相關資料：2月5日星期六問責

標籤效應打擊學生自信

前教署高官斥教界「偽善」

「中大國際化討論會」詳細報導