進軍愛丁堡系列(二): 拉雜成軍﹗

進軍愛丁堡系列(二): 拉雜成軍﹗
--領男

大哥阿昌大聲拍掌：「好好好﹗隊員過黎集合﹗」

聽到大哥招魂，我呢隻小鬼都立即歸位觀眾席。文質彬彬隊長阿維走過對我笑一笑說：「唔該比支水我丫，Thank you」。第一眼望見每位球員，到跟他們傾談，從談吐到外表，跟主流媒體上見慣的露宿者真是大不同，聽何渭枝說，才知露宿者足球員的背景及組成經過，是個 耐人尋味的故事。

「你望下果個，佢叫阿新，踢左波短短三個月，愈踢愈上癮。有時無波練，佢都問我地借個足球，夜晚落街對住牆練習，阿新跟操之後個人積極左好多，係全隊進步最快既一個，依家人人叫佢深水埗馬勒當拿﹗」

聽何渭枝說，阿新加入球隊前好爛賭，佢話自己以前過一過大海就十萬八萬，真係輸到要訓街，但轉個頭來，現在不但找到工作，而且是全隊最高薪的球員﹗阿新就射空氣的卡路士，望落又真係幾似馬勒當拿，個子不高，走起來一雙摩打腳，腳法生疏但很有活力。

其實球隊仲有不少好波之人，好似阿昌，原來係前甲組球隊東方(名宿李建和成名的東方王朝)青年軍。他是球隊的精神領袖，一直也有做開義工，所以社協同事一想搞波，就立刻斟佢加盟。至於隊長阿維是個sale屎，口才了得，在球隊誓師大會當天，他粉墨登場做埋MC。

進軍愛丁堡的球隊，可謂人才濟濟，位位簡直一表人才。

聰頭問：露宿者球員究竟點揀選出來？

廢Sir：「社區組織協會(社協)大概係十二月份開始係油麻地同深水埗組織露宿者，希望密識到班鐘意踢波又有心一齊組隊的成員，到三月份先叫做組成一隊波，正名號『中國香港曙光足球隊』 」

其實，曙光隊的故事沒有我們想像中順利。現在眼見準備出發的球員，全部都來自深水埗區。因為當社協組織油麻地露宿者的時候，發覺他們的背景及生活都幾複雜，很難組織起來，他們也想球隊的組合多元一點，但最後剩下的，就只有來自深水埗比較積極一群。

廢Sir仲話，他邀請每位虎將加盟之前，都interview過晒。除了簡單了解一下生活背景，還要看看他們有沒有決心代表香港出戰。同一時間，阿Sir安排左個Panel評核誰較適合飛去蘇格蘭，才敲定最後入選大軍陣容。

聽何渭枝說，他們最重視的球員不是球技，而是出席率。因為大部份露宿者都沒有手提電話，要找他們有不少困難，好像當晚練習，就只有一半成員出席，咁耐以黎，齊晒人練波既，都係兩次左右。

最球隊成立之初，除了人腳問題，令廢Sir煩腦的還有球員的紀律。

「隊波一開始果陣真係幾騎呢，你見到一個二個擔住口煙差住腰熱身，成班友好似踢少林足球咁，真係唔知好嬲定好笑。依家已經好左好多喇，至少個個知道球場範圍唔准食煙講粗口，咁至慢慢似番隊波」

講到呢度，昌哥都操到班球員上晒力，想係場邊搵四條友出來鬥番場波。我當仁不讓，飛身躍進球場，還有球隊的無名英雄 Terrence、阿東，他們都幫助球隊由零開始的猛將，當然不少得體力足以支撐十分鐘阿野。

友誼賽最後和氣收場，但昌哥仲唔肯放走球員，急不及待叫大家圍圈cool down，最金既係球隊臨收工前還要接受30多下捲腹訓練。呢個時候老廢去左邊？昌哥向他招手示意，佢閃爍其詞：「我都要？」，昌哥話：「你唔好問我，你問下球員肯唔肯過你丫拿？﹗」

看見文裝一道的廢Sir也要捧著肚腩硬食三十下，除了令人明白什麼是球隊；彼此坐在觀眾席上，就好像在閱讀一段屬於露宿者的足球歷史，另一部《少林足球》從銀幕搬到眼前。

(採訪：葉蔭聰、阿野、領男，攝影：葉蔭聰、領男，執筆：領男)


預告：阿巴莫域治花過億搞車路士，曙光隊進軍愛丁堡要用的資金，亦不遑多樣，欲知千萬大軍的幕後黑手是誰，請看下集：《美麗的官商勾結》

重溫進軍愛丁堡系列：

進軍愛丁堡系列一: 備戰露宿者世界杯

如果你覺得這篇文章寫得不錯，或這個網站辦得不錯，請捐款支持我們吧！



This work is licensed under a Creative Commons License